探射燈：狹隙中掙扎 火柴盒校舍 重置路遙遙
被忽略的「火柴盒校舍」，教學環境愈見困難。在六十年代起，港府規劃於屋邨範圍興建面積約三千平方米或以下，俗稱「火柴盒校舍」的小學。本港現時仍有廿八間火柴盒小學，相比一眾千禧校舍，歲月痕迹遍布校園角落，環境更見細小擠迫。本報記者採訪三間「火柴盒校舍」的校長，他們均表示先天因素令校園規劃掣肘甚多，由於校齡達三、四十年，需要年年維修。不過，政府卻未有積極協助維修檢查，更欠缺資源津貼，重置校舍計劃遙遙無期，影響校園發展。立法會議員批評政府政策失誤，應盡快優先重置環境惡劣的火柴盒學校。
37年迦密梁省德 無球場 限發展
「火柴盒學校最大的困難係空間唔夠，一般學校（佔地面積）大約有幾千平方米，但我哋學校只得五百多平方米，但就同樣有二十四班，喺教學同課外活動地點嘅行政安排上多咗好多負擔。」迦密梁省德學校校長李小娟表示，由於空間不足，令校園規劃有所局限，「好似我哋冇自己嘅籃球場，要借用屋邨嗰個；又好似田徑隊咁，根本冇辦法開，因為冇地方訓練。」
靠籌款增設施
該校每層均設有電子琴，讓教師在課室上音樂課，解決音樂室不足，「我哋寧願禮堂細啲，加建部分地方做電腦室，又喺樓層空間自己搭建醫療間，用盡所有地方，設施都要多謝家長經常籌款支持先設置到。」
學校維修工程亦是「火柴盒校舍」所面對的困難之一。李坦言，該校成立至今已有卅七年，常出現喉管滲漏、天花外牆剝落等問題，需要維修，「年年都需要維修，好似去年廁所天花剝落都整咗。」惟李指政府從未主動到「火柴盒校舍」進行檢查，「我哋始終唔係專家，唔知邊度有問題，希望政府可以主動啲。」
44年葵盛信義 維修多 乏資助
有四十四年校齡的基督教香港信義會葵盛信義學校，需要進行各類維修，政府雖然有提供資助，「我哋可以申請緊急工程資助，但教育局限咗必須至少夠三千蚊先可以批資助，有時爆水喉未必用到三千蚊，但都要維修，變咗要學校自己出。」
常租場開支大
該校校長徐起鸝表示，校舍硬件配套先天不足，政府卻忽略「火柴盒校舍」的困境，她認為政府應增加資助津貼協助校方，「好似我哋冇運動場地，經常要租用政府嘅運動場地；我哋禮堂冇表演台，有時話劇、畢業禮要借用中學禮堂，令我哋開支多咗，希望政府可以提供津貼協助學校。」
46年坪石聖約翰 先美化 待搬校
位於坪石的聖公會聖約翰小學，經過三次申請後，在一四年終於成功獲分配同區新址重置校園，「我哋學校有四十六年歷史，校舍設備環境始終比唔上千禧校舍，咁都會減少咗競爭力，新校舍將會大三倍，到時可以更有效咁規劃校園生活。」校長金永添指，現時校園地方有限，經常需要一室多用，維修工程不斷，「但我哋都好致力咁維持校園環境美化，令學生即使喺火柴盒學校就讀，都可以有較好嘅環境。」
圖：吳啓偉、朱偉坤
文：紀靜雯、陳偉豪