中環出更：長毛天秤甩轆 財爺笑讚
財政司司長曾俊華（鬍鬚曾）尋日出席立法會財務委員會簡報財政預算案期間，社民連議員梁國雄（長毛）將前日在預算案未能送出、諷刺預算案只重視「三跑」等基建，輕視民生嘅道具天秤親自送交鬍鬚曾。不過，天秤上代表全民退休保障嘅一對老夫婦，竟然重過天秤另一側嘅基建工程，將道具諷刺嘅對象完全反轉，認真甩轆。
諷刺對象反轉
難怪鬍鬚曾笑笑口回應：「你（長毛）啲手工真係『愈做愈好』」，更讚天秤「係未入得M+（藝術博物館），可以繼續努力」。長毛會後解釋，天秤原本設計是老夫婦較輕，另一側放了大白象和代表「三跑」的飛機道具，諷刺政府重基建、輕民生，但在遞上天秤時被保安推跌部分道具，才會出現霎時嘅甩轆場面。
長毛又笑稱，甩轆道具出自黨友曾健成（阿牛）手筆，讚揚阿牛出名手工好，畫功精緻，但強調創作意念是出自佢自己。難為長毛仲笑得出，既然道具有深層次嘅象徵意義，為何不固定天秤兩邊嘅高低呢？莫非諗住個天秤真係用嚟秤嘢嘅？
卓妮