中環出更：染病「怡」戴口罩 唔怕誤會
早幾日東華三院舉辦新春團拜活動，主席何超蕸與一眾董事局成員齊齊出席向大家拜年。一眾總理除咗欣賞舞獅外，仲輪流玩接公仔遊戲，搶接由龍獅隊在高處拋下猴子公仔，寓意迎春接福，氣氛好熱鬧。講起農曆新年傳统，何超蕸就話自己好傳統，由細到大都一定跟足過年習俗，唔會於大年初一洗頭，仲成個正月都絕對唔會買鞋添，佢話忍一個月都唔係好耐啫。
卓妮見到總理李曠怡（Jason）戴住口罩現身，原來佢感冒發緊燒，所以團拜時都不忘拎番張「身體健康」揮春同大家道賀。不過，問佢驚唔驚呢期戴口罩出街有機會畀人誤會做暴徒，佢就笑笑口話唔擔心，因為自己真係病喎。其實應該係佢西裝骨骨點睇都唔似暴徒至真！
馬清揚赴英還兒女債
同場仲有總理楊嘉成、廖偉麟、蔡榮星、馬清揚、前主席施榮恆及前總理黃業光等。楊嘉成今個農曆新年去咗歐洲旅行，而馬清揚同黃業光都去完英國返港，事關要去探「老細」，邊個咁有分量做得佢哋「老細」呢？咪係佢哋啲仔女囉！兩人分別有三個仔女，年紀差唔多又於英國讀書，所以佢哋有時咁啱就會一齊去英國，又試過探仔女期間抽時間去蘇格蘭一齊揸吓車。
馬清揚仲話風水輪流轉，以前父母當自己係老細，依家就到佢服侍啲仔女。講到過年會唔會唔洗頭，黃業光就透露細個阿媽真係叫佢初一唔好洗頭，但細個邊會聽，洗完頭阿媽都冇佢乎喎。
卓妮