「乍暖還寒時候，最難將息。」呢排天氣陰晴不定，忽冷忽熱，加上正值流感高峰期，最容易被病菌入侵。不過咁，咪以為病向淺中醫就冇事，家陣輪公院急症室仲慘過輪大米，等十幾粒鐘都未必見到醫生，分分鐘小病變大病，大病變冇命，問你怕未。
好似聯合醫院急症室咁吖，輪候時間長就出晒名嘅嘞，點知上星期日仲誇張，非緊急病人嘅輪候時間長達十六點五小時，次緊急病人都要等十五點五小時，你話係咪不可思議吖？有患子宮瘤嘅女病人因為肚痛求醫，由星期六晚等到星期日朝早都未見到醫生，向姑娘查詢，竟然話早過佢登記嘅病人仲等緊，叫佢繼續等喎，有冇再離譜啲吖。
愈等愈谷氣嘅唔係個別例子o架，有父母帶同發高燒嘅年幼女兒睇醫生，左等右等連醫生個影都未見到；又有被木刺插傷嘅傷者，忍痛等足一個晏晝，人龍依然郁都未郁過，唔怪得病人質疑到底有冇醫生返工喇。
可能食衞局局長高永文都知衰啩，尋日向市民耍冧，話家陣係流感高峰期，每日有逾六千人使用急症室，醫管局已盡量抽調人手，希望市民體諒喎。聯合醫院又點解畫呢？發言人輕描淡寫咁話喎，人手安排同平時周末一樣，有八至九名醫生當值，不過因為星期日早上急症室接收多宗緊急個案，需要調動人手優先處理。
乜嘢盡量抽調人手吖，乜嘢接收多宗緊急個案呀，都係講咗等於冇講嘅官腔。好明顯喇，急症室人滿為患，有緊急事故係藉口，醫院人手長期不足先係主因，更確切啲講，係資源分配有問題。話時話，同樣情況唔係呢幾日先至發生，新春期間多間公立醫院急症室一樣逼爆，內科病床使用率更超過百分之一百，雖然港府話敦促醫管局啟動應變措施增加病床，其實都係敷衍民意嘅咋。
公立醫院前線人手不足，十個煲七個蓋，爆煲只係遲早問題，如果政府係負責任嘅，冇可能坐視問題長期存在，無所作為。大家有眼睇，當局一方面話要長遠增加公院床位，培訓更多醫生，一方面又密謀削減醫療開支，自打嘴巴。呢，即將公布嘅財政預算案，傳聞當局以結構性財赤為由向公院開刀，咁搞法，公院亂象唔雪上加霜至奇。
最荒謬嘅係，明知醫療資源捉襟見肘，醫管局高層照樣大幅加薪，上年度五名高層人員嘅薪酬支出較前年上升百分之七，呢啲咪叫「殘民自肥」囉。家陣社會已經立立亂，官老爺翹埋雙手坐視市民睇病難，盞火上加油嘅咋！