政情：旺角爆暴亂 區會急拜神
東方報業集團按照傳統，早前於立春日分別為香港運程、政治及治安到黃大仙祠求籤，最後求得三支「下下籤」，其中治安方面求得「東施效顰」，言猶在耳，一踏入猴年就發生持續九小時嘅旺角暴亂，大批示威者掟磚頭、縱火等暴力行為一次過出現，顯然應驗求得嘅三支「下下籤」；另外一個不為人知嘅因素，可能同油尖旺區議會有關。上月初新當選油尖旺區議會主席嘅葉傲冬自爆至今未拜地主，稍後會「補鑊」聯同區議會兄弟拜區內各寺廟，盼望日後區泰民安。
葉傲冬話上任後好忙
旺角暴亂發生至今剛滿半個月，警方拘捕逾七十名涉事者，包括前日拘捕下落不明多時嘅本土民主前線發言人黃台仰，外界都唔希望類似旺角暴亂事件再次發生，據聞油尖旺區議會都有跟進行動，就係打算齊齊到區內各寺廟參拜。
葉傲冬日前出席一個新春活動時透露，過去每年都會去拜地主，誠心祈福，之不過佢於今年初接任油尖旺區會主席後好忙，之後就發生旺角暴亂事件，非常後悔上任後冇拜地主，稍後會由道教聯合會副會長、油尖旺前委任議員侯永昌帶領，聯同區議會兄弟盡快拜番區內各寺廟，加上帶埋燒肉、雞、酒等物品，以求區泰民安。
率眾補鑊 求個安心
事實上，涉及宗教嘅事宜，如拜神或拜地主一向都係「信則有，不信則冇」，今次葉傲冬自爆要盡快率眾去誠心祈福「補鑊」，相信都係從呢個思路出發，希望可以求個安心。然而，「補鑊」嘅嘢可一不可再，治標又治本嘅方法係防患於未然，一方面警方嚴正執法，盡快將涉事者拘捕，至於區議會層面亦應做好下情上達工作，將市民嘅訴求或不滿盡快梳理，避免成為隱而未爆嘅炸彈！