中環出更：長毛贈「督導獎」 CY拒收
立法會於尋日趁元宵佳節舉行新春酒會，一改以往新春午宴做法，亦取消官員與議員大玩遊戲嘅環節，身為主人家嘅立法會主席曾鈺成解釋，改辦酒會只因夾唔到時間，同加會無關；相反一如既往嘅係，社民連「長毛」梁國雄甫現身就示威，最後又被要求離場，睇嚟新一年立法會依舊多爭拗喇！
立會新春酒會 公文袋冇影
泛民陣營唔似得去年全面杯葛唔出席，今次酒會共有八名泛民議員報名，不過冇任何一名公民黨議員報名，就算報咗名都唔一定會出席，好似工黨張國柱話，自己要主持會議至晚上八點所以出席唔到，仲話有一名九十多歲嘅婆婆因特首梁振英抵達立法會，搞到行程受阻遲咗出席會議添！
長毛就趁曾鈺成致詞時搶先上台，希望將「一帶一路吹水督導獎」，同埋一九六六年騷動調查委員會報告書送畀梁振英，但梁振英拒收長毛嘅示威物品，直到長毛離場後，酒會先繼續進行。
曾鈺成致詞時疑做「和事老」，呼籲官員同議員互相包容，利用餘下五個月時間處理好積壓嘅事務，做好對社會同市民有利嘅事。不過話雖如此，一場酒會都未見和諧氣氛，可以預期未來數個月於議會嘅爭拗唔會停止。
卓妮