中環出更：掌科大校董會 廖長城唔怕衝擊
近年激進本土聲音抬頭，蔓延至八間大專院校，部分大學學生會趁校委會或校董會舉行前發起圍堵等抗爭行動，爭取修改相關大學條例等訴求。相對而言，科技大學迄今未見有激進嘅校園行動抗爭出現，校董會主席廖長城表明，唔怕主持校董會會議時，遇上本土派發起衝擊行動，校長陳繁昌更指，科大生冇乜搞政治，校風都係崇尚學習，似乎二人均對學生信心十足。
科技大學尋日舉行鄭裕彤樓開幕典禮，新世界發展創辦人鄭裕彤嘅兩名兒子鄭家純及鄭家成、科大一眾領導層，包括校長陳繁昌、副校長翁以登、校董會主席廖長城均有出席支持。
陳繁昌盼學生攞諾貝爾獎
對於多間大學接連發起抗爭行動，廖長城似乎好淡定，表明唔怕開校董會時會有本土派衝擊，其後又話科大一向都好平靜，山明水秀，科大生崇尚學習同研究嘅風氣，加上科大國際排名又升咗，希望年輕人搵到機會發揮所長。
出席同一場合嘅翁以登認為，科大生嘅傳統係好勤奮同有目標，科大亦畀好多機會佢哋，無論學生想盡社會責任、交流、讀研究生等，學校都有好多計劃同各類型嘅支持，相信因而對社會亦冇咁多怨憤。陳繁昌則提及，科大已經有二十五年歷史，希望到三十周年、三十五周年時，可以有土生土長嘅學生有國際學術成就，例如攞諾貝爾獎或者研發出全世界搶購嘅高科技產品。
至於科大鄭裕彤樓，樓高八層，面積一萬平方米，由鄭裕彤慈善基金捐助，新世界發展主席鄭家純致詞時話，父親鄭裕彤一直重視教育同培訓人才，又指鄭裕彤樓擁有國際水平嘅設備，寄語學生應好好珍惜學習機會，日後有能力就回饋社會。
卓妮