政情：資深大狀 謀立會改朝換「袋」

分歧始於政改方案爭議

大律師公會同公民黨嘅分歧，始於二○一七年政改方案，當年公會發表立場書直指「公民提名」超出《基本法》規定，但公民黨堅持死撐「公民提名」，仲話呢個係同中央政府嘅「談判策略」，笑公會中人「只懂法律、唔識政治」。其後佔領行動爆發，公會發聲明強調市民必須遵守法庭嘅刑事禁制令，但公民黨中人卻繼續鼓吹市民集體違抗禁制令，聲稱犯法後自首就無損法治精神等，令公會中人相當不滿。

到近日嘅版權法爭議，來自公民黨嘅法律界議員郭榮鏗代表網民提出修訂，要求政府同版權業界進一步豁免網民嘅侵權行為。但公會嘅立場書就表明， 單方面同倉卒地引入有關修訂並不理想，並強調不應將主體草案「綁架」以求迫使他人讓步。

對於新春旺角暴亂，公民黨一方面就話譴責暴力，但係另一方面又話警方開槍唔啱在先、騷亂係由政府施政失誤同小販管理政策引發、示威者只係官逼民反等等，並且有多名黨員向被捕人士提供免費法律支援。據聞事後有公會中人在網上高調炮轟有關歪理，甚至私下叫傳媒唔好再以「前大律師公會主席」嚟形容某幾位公民黨要員，以免「整臭晒」公會個名。

難覓有分量法律界人士

消息指出，過去一直力撐公民黨嘅資深大狀圈子中，有愈來愈多人不滿該黨嘅表現，質疑佢哋愈嚟愈偏離法治，唔再以法論法，覺得應該搵個中立啲同更有分量嘅人，出任法律界喺立法會嘅代表，或者游說本身唔係咁激嘅郭榮鏗退黨。不過講就容易，做就困難，稍為中立啲又有分量嘅法律界人士，絕大部分都只顧搵銀，唔會有時間同興趣搞政治，因此暫時仲未搵到合適替代人選。