古人話「喪亂多妖孽」，真係一啲都冇講錯。香港紛紛擾擾，家嘈屋閉，本來已經七國咁亂，加上假難民源源不絕，妖孽為患，更加搞到烏煙瘴氣。
呢，尋日又有一批南亞人蛇喺大嶼山搶灘，警方接報後展開水陸大圍捕，擾攘咗七粒鐘至拘捕七人。一如既往，呢批人蛇懷疑先往內地，再喺蛇頭協助下乘舢舨偷渡來港，證明呢條途徑已成為假難民嘅主要通道。
正如有人話齋，大部分南亞假難民都係經陸路或海路從內地湧港，當中唔少人喺其祖家或逗留內地期間已案底纍纍，內地當局任由呢啲積犯來港「換水」，繼續為非作歹，等於將香港當「馬桶」，幫內地「排毒」。尤其最近內地經濟唔係咁好，刑罰又比香港嚴厲，隨時會有更多假難民湧港，內地當局放軟手腳，既唔把關，又唔堵截，簡直係靠害。
冇錯嘞，內地放假難民來港，即係將禍水外引嘅啫。日前入境處揭發兩名乘直通車抵港嘅印度籍男子有可疑，拒絕佢哋入境並即時安排遣返內地，點知兩人居然亡命跳軌，喺直通車臨開動前伺機奪門衝出車廂，然後跳落路軌再攀爬鐵絲網逃去無蹤。假難民喺執法人員面前都咁猖狂，你話係咪恐怖吖。
話時話，假難民乘搭直通車闖關已經唔係第一次。舊年就有四名印度籍男子兩度試圖闖關，第一次持印度護照喺羅湖口岸入境被拒，第二次乘直通車抵達紅磡管制站後索性將證件毀壞及丟棄，然後逗留月台禁區範圍，最後被入境處人員發現遣返內地。仲有吖，部分假難民除咗冇任何身份證明文件，而且隱瞞來港目的，就算被拒入境亦賴死唔走，搞到執法部門踢晒腳。小數怕長計，淨係印度籍人士提出聲請嘅個案咋，過去幾年就飆升超過十三倍，問你驚未。
即係咁，如果假難民只係來港打黑工，咁都仲係小事，最離譜係唔少假難民作奸犯科，販毒、搶劫、打架、勒索等等，成為社會治安毒瘤。本報早前踢爆黑幫和勝和前坐館「上海仔」組織假難民僱傭兵團，一條龍由兵頭到非洲及南亞等地「揀蟀」，再安排假難民從海陸空或內地偷渡來港從事非法勾當，唔止令香港變成難民港，而且淪為罪惡之城。以前假難民多數喺尖沙咀重慶大廈及中環蘭桂坊一帶搵食，家陣遍地開花，連土瓜灣、旺角、深水埗甚至元朗亦紛紛淪陷，都咪話唔大鑊。
講到底，要將假難民拒於門外，港府除咗要堵塞漏洞，全力把關，亦應該要求內地協助堵截，而更直接嘅辦法就係考慮退出聯合國《禁止酷刑公約》。須知對假難民仁慈，就係對市民殘忍，香港繼續成為「馬桶」，就算唔毒死都臭死喇！