綠色先鋒：清山潔水
香港郊野景觀美不勝收，但經常有人「冇手尾」，堆積大量垃圾，令郊野公園頓變「垃圾公園」。有龍舟隊「睇唔過眼」，多年來自發組織清理行動，走遍各個郊野公園，甚至遠征東龍洲尋找垃圾蹤迹，再清理、分類及回收，又曾帶領多名學生義工參與，務求教育下一代「自己垃圾自己帶走」，齊齊保護大自然。
「冇比賽嗰排，成隊人會約埋上城門水塘行山當練體能，成日見到行山人士留低啲物資唔要，搞到滿山垃圾。」龍舟隊「泛非龍」聯絡人黃濟國（Sammy）表示，一眾隊員自一二年起發起「青山綠水行動」，到城門郊野公園清除垃圾，上月更聯同環保團體遠征東龍洲，自設飛索裝置將垃圾吊上懸崖回收，「因為真係睇唔過眼，所以先會去做咁多嘢，想令環境乾淨啲。」
貪方便留低 袋樽罐盒樣樣有
不僅「執垃圾」，龍舟隊更與多間中小學及環保團體合作，帶學生上山參與清除垃圾行動，實地上一堂環境教育課。在Sammy帶領下，沙田浸信會呂明才中學約二十多名師生，日前清晨沿山徑環繞城門水塘，分組在草叢、河畔搜尋垃圾，至下午點算時已收集到逾二十公斤重的垃圾，當中大部分為行山人士「貪方便」遺下的膠袋、膠樽、鋁罐和發泡膠盒等等。
在Sammy指示下，學生將收集的垃圾分類，更發現有已「解體」的殘舊食物包裝紙和膠樽，還有絕版汽水樽及鋁罐，「膠樽、膠袋唔會自然分解，只會碎開一粒粒，隨時畀動物食咗落肚，對環境傷上加傷。」三名參與行動的中二學生莊、張和李同學均指，親身參與活動後更注重「手尾」，並承諾不會再帶樽裝飲品行山，盡量減少製造垃圾。
「只係短短時間內已經收集到咁多垃圾，試想像吓，咁多年嚟我哋對環境嘅傷害有幾大？」Sammy慨嘆，近年行山人士的環保意識雖有增強，但始終不少人仍抱錯誤觀念，認為垃圾「自然會有人清」，作出浪費及破壞環境的行為，「只要每人注重多少少，帶番走自己製造嘅垃圾，個情況已經會好好多！」
圖：朱偉坤
文：李耀宗