政情：新春留港 姚思榮做「拆彈專員」
每逢農曆新年，好多議員都會趁立法會休會外遊抖一抖，但旅遊界議員姚思榮就冇呢支歌仔唱，年年都要留港坐鎮度歲，冇得放假。姚思榮尋日出席傳媒茶敍時解釋，農曆新年係旅遊旺季，業界呢段期間總會收到唔同類型嘅投訴，例如酒店入住率爆棚，自言身為業界代表都要幫手「拆彈」，今年更加中到應一應，初一晚到初二凌晨旺角發生暴亂，好彩冇外遊留港應對事件。
未係時候視察滬迪士尼
講起旅遊，上海迪士尼樂園今年中開幕，被視為直接向香港迪士尼搶客。
作為旅遊業界代表會否率團視察？姚思榮坦言未係時候，根據經驗，主題樂園開幕初期安排都會比較混亂，所以會等運作上咗軌道先會到訪。不過，姚思榮話，香港迪士尼唔可以單靠減價拉客，長遠一定要落實第二期擴建計劃先可以維持競爭力喎。