古人話，天地不仁，以萬物為芻狗。其實何止大自然冇情感，今時今日仲有狗官不仁，公然當警察係狗，真係講都冇人信o架。
有辦你睇，保安局前局長、港區全國人大代表李少光尋日出聲譴責旺角暴亂事件，一邊話後生仔是非顛倒同混淆，好似被人落咗藥咁被煽動，由有抱負嘅年輕人變成禽獸；一邊又話暴徒打警察時，「見到狗跌咗落地下，你都唔會打佢，何況係人呢？」
即係咁，作為前保安部門阿頭，李少光眼見幾十個前同袍畀暴徒打到一仆一碌，打到頭破血流，撐警係無可厚非嘅，不過佢居然將前線警員比喻係狗，點止係不倫不類咁簡單，直情係傷口上撒鹽，到底係撐警定踩警呢？
係人都知，西方人愛狗如命，亦好少用嚟鬧人，頂多話work like a dog，形容「做到隻狗咁」。但各處鄉村各處例，中國人鬧人幾乎無狗不歡。呢，狼心狗肺，豬狗不如，狗屁不通，狗娘養的，狗仗人勢，狗急跳牆，狗眼看人低，狗坐轎子不識抬舉，狗拿耗子多管閒事，肉包子打狗有去無回，大文豪魯迅仲寫過一篇著名嘅「痛打落水狗」添，真係數之不盡，要幾多有幾多。
話時話，鬧警察係狗，已經係反對派嘅傳統。事關當年六七暴亂，暴徒周街放「菠蘿」，仲辱罵華籍警察係「黃皮狗」，洋警官係「白皮豬」，揚言「紅燒白皮豬，生炒黃皮狗」，所以一講到狗，所有集體回憶即刻返晒嚟，前線警員唔嬲就假咯。
正如前警隊一哥李明逵曾自爆，任職警隊時曾畀人鬧過「烏龜、黃皮狗」，至今記憶猶新，成為揮之不去嘅陰影。而佔中之亂時期負責解畫嘅總警司許鎮德，亦話有唔少警員同佢訴苦，對於經常被稱「黑警」及「警犬」感到心痛，聽見都閉翳。
所以話，李少光口不擇言，唔止係辱警，直頭係侮辱自己人格呀。查實唔少先進地區都有所謂「辱警罪」，就以澳門為例，《刑法典》規定任何人如果喺公務員執行職務時或因職務之故對其作出侮辱，將有可能觸犯「加重侮辱罪」，最高可被處四個半月徒刑。好彩香港家陣仲未立法啫，如果唔係，李少光呢番「倒地狗」論，隨時洗定八月十五都得咯。
正所謂，良言一句三冬暖，惡語傷人六月寒。記得當年內地批鬥前國家主席劉少奇，「砸爛劉少奇的狗頭」、「打倒劉少狗」等政治口號叫到拆天，如果李少光繼續講嘢唔經大腦，火上加油，遲早會有人嗌「打倒李少狗」o架。