政情：福建幫籲踢走亂港政黨

旺角暴亂事件連日來喺社會引發激辯，包括有個別泛民中人向被捕人士提供義務法律支援惹來爭議，身為福建幫之首嘅福建社團聯會主席吳良好尋日趁聯會舉行新春團拜時，提及旺角暴亂事件就火滾，批評暴徒行為令人髮指，要對佢哋予以最嚴厲嘅譴責。佢其後又向泛民主派「開年」，呼籲鄉親於月底立法會新界東補選及九月立法會大選時做嘢，齊將亂港嘅政黨踢出立法會。