政情：乃光驚（火羅） 繼昌淡定
立法會多個專業界別嘅功能界別向來係兵家必爭，建制派及泛民都各不相讓，其中兩個重要戰場係會計界和資訊及科技界，於二○一二年一役均由泛民背景代表，分別係會計界議員梁繼昌（Kenneth）及資訊科技界議員莫乃光（Charles）當選，事隔四年後，選情或起咗微妙變化，前者面對建制潛在對手多多，但其實形勢愈亂，Kenneth更加坐定粒六；相反Charles嘅選情似乎危危乎，一來潛在對手愈來愈活躍，二來距離登記選民限期不足三個月，選民登記數目下跌後未見回升，加上佢尋日出師不利煮燶雞，莫非預視佢嘅選情凍過水？
梁潛在對手多 愈亂愈有利
公共專業聯盟兩名議員Kenneth同Charles尋日舉行新春傳媒聚會，言談間提及七個月後所屬界別嘅選情，其中Kenneth話過去四年間，有多個會計界組織出現，更有無限量資源支援，大搞國情班同平價旅行團去照顧選民，佢其後又提及多名潛在對手人選，其中一人為會計師公會前會長。
有政界中人分析，Kenneth數來數去嘅潛在對手，都具有建制派背景，未見有其他路線嘅疑似候選人，愈多建制派背景人士齊齊落場，對於Kenneth選情更有利。
今屆選民少 莫連任存暗湧
相對於Kenneth疑坐定粒六，Charles面對嘅情況真係有天壤之別，佢分析歷屆資訊科技界選民數目都有變化，任期中段時選民數目最少，但往往去到選民登記截止前都會回升到同之前相若水平。不過，現時距離登記選民限期只剩不足三個月，但資訊科技界選民人數只有五千多人，仍未見回升，暫時比上屆仲要少，加上Charles見潛在對手愈見活躍，因此有人質疑對手係咪咁淡定，唔使「吹雞」去催谷登記選民喇。
選民人數多就話驚種票，依家人數少又憂慮多多，睇嚟Charles真係亂晒陣腳。除此以外，Charles近年於多項議題嘅立場被指模糊不清，有業界中人質疑Charles未有第一時間同業界站在同一陣線，包括政府提出設立創新及科技局，以及正在審議嘅版權修訂條例草案，似乎Charles要有心理準備，到時要慢慢向業界解說立場。
事有湊巧，Charles尋日煮「燒烤風味」玫瑰豉油雞失手煮燶，唔通預視佢嘅選情都一樣，提早聞到陣（火羅）味？