中環出更：侯強拜年 爆福元涉僭建
上水鄉事委員會主席侯志強（侯強）當場舉報十八鄉鄉事委員會主席梁福元嘅大宅涉僭建！梁福元同佢細仔、元朗區議員梁明堅（Jason）尋日邀請傳媒到其元朗大棠萬呎大宅拜年，侯強亦湊熱鬧到場。雖則新年新正頭最好一團和氣，侯強對梁福元認真毫不客氣，一入屋未坐定已經左望右望，之不過佢唔係欣賞大宅，而係逐一踢爆大宅嘅疑似僭建物，仲話要舉報梁福元添！
侯強與梁福元均於新界村屋居住，侯強一入屋首先指住梁福元嘅花園，直指佢涉「霸佔官地」，其後又話梁福元嘅泳池、水箱、天台玻璃屋統統都係僭建物，話要舉報梁福元。不過，梁福元冇有怕，自言當年已經喺鄉議局前主席劉皇發（發叔）號召下，向政府申報僭建物，唔怕侯強舉報喎。侯強今次理直氣壯指出人哋嘅僭建物位置，唔知自己寓所係咪零僭建呢？
梁萬呎屋曝光 種金花茶
講番罕有曝光嘅梁福元村屋大宅，原來係萬呎大宅，其中未計天台屋已經有二千一百呎，並坐擁八千呎前後花園，而侯強對於梁福元花園棵金花茶樹情有獨鍾。話說梁福元幾年前獲朋友送贈金花茶，之後索性自己種樹，自己摘花沖茶飲。另一方面，梁福元甘願留喺大宅種吓金花茶，其中一個原因可能係Jason兩歲半大女Crystal牙牙學語嗰陣，首先學識嘅唔係叫爸爸媽媽，而係先叫爺爺，氹得梁福元鬼咁開心。
翻查資料顯示，金花茶係國家一級保護植物之一，似乎呢幾棵金花茶樹都好值錢，侯強一聽到每朵金花茶可以價值五元，一度講笑話要叫人做嘢，但唔係摘多幾朵花當手信，係斬咗棵金花茶樹返去自己種喎。
卓妮