王小二過年，一年不如一年。呢句話就係港府嘅寫照，管治混亂、民望低迷固然唔在講，更令人非議嘅係為富不仁，涼薄成性，唔怪得搞到民怨載道喇。
上月發表嘅施政報告劣評如潮，最新民調顯示市民嘅不滿率為五成四，滿意率只有一成八，滿意率淨值為負三成六，成為回歸後最低評分嘅一份。係人都知，港府胡混度日，回歸後無一份施政報告令人滿意，前特首曾蔭權爵士任內固然引起怨聲載道，估唔到今年施政報告仲差，你話係咪一蟹不如一蟹吖？
即係咁，今年施政報告冇料到，尤其對全民退休保障等重大民生議題卸得就卸，更加令人不滿，評分尋底係意料中事，家陣市民最關心嘅係月底出爐嘅財政預算案究竟有冇料到。會計界普遍預測本年度財政盈餘高達七百幾億至九百幾億元，遠遠高過舊年財政司司長鬍鬚曾預測嘅三百六十八億元，財政儲備將達到八干五百多億元，足夠政府二十四個月開支，簡直係窮到只剩下錢。既然庫房水浸，市民梗係希望港府好好善用呢筆意外之財喇。
嗱，尋日又有政黨到政府總部請願，要求預算案增撥資源，紓解民困，並提出十項建議，包括寬免差餉、提高個人免稅額、寬免商業登記費同寬免公屋租金等。鬍鬚曾聽到未吖？
正所謂，取之於民，用之於民。港府財源廣進，庫房豐收，好應該回饋社會，就算只係派粒糖，畀市民尤其基層市民甜吓個嘴都好吖。家陣話就話失業率低，實際上百業蕭條，旅遊及零售等行業更加陷入寒冬，預算案唔開倉濟民，仲要等到幾時呢？尤其係家陣香港立立亂，社會躁動，民怨沸騰，成個炸藥庫咁，如果港府繼續做守財奴，懶理民瘼，隨時火上加油，激發更大民怨，到時想唔官逼民反都幾難。
話時話，香港日趨激進及暴戾，行政立法惡鬥不休，港府開倉紓困，唔止係幫市民，仲係幫自己。大家都知喇，激進政客年年拉布狙擊預算案，今年肯定唔會例外，如果預算案又係一毛不拔，等於為反對派提供彈藥，盞衰多幾錢重嘅咋。
講到呢度，令人諗起一個江湖傳聞，由於鬍鬚曾成日喺網上抽水呃Like，外界一直傳佢想博取民望，喺仕途更上一層樓。不過咁，正如有人話齋，鬍鬚曾孤寒成性，而且年年估錯數，連小學生都不如，睇怕都幾難更上一層樓嘅嘞。
總而言之，無論係為市民，定係為港府，或者係為自己，鬍鬚曾都唔可以再做守財奴。咪話功夫茶唔提醒吖，施政報告已經劣評如潮，如果預算案又搞到天怒人怨，隨時爆大鑊都似，點止旺角淪為戰場吖！