政情：八網難逃：譚Sir吊飾被當針包「落降」
農曆新年新正頭，各個政黨為求「入屋」都會派吓揮春、月曆等賀年禮物，希望街坊記得自己，但禮物可以隨街派，街坊點樣「善用」又係另一回事喇。有網民最近上載印有民建聯立法會議員譚耀宗（譚Sir）的「針包」，仲當正針包係「降頭仔」用針狂拮，還要加上一道符加大力度，有網民更加抵死留言話要廣傳各方好友，認真大仇口。
原意為長者除厄運
譚Sir黨友陳克勤代為解畫，認為這個「針包」應該係內藏香囊的手機吊飾，因為老人家鍾意戴住驅病、除厄運，但他自言冇好似譚Sir咁傳統製作這類吊飾喇。本報曾向譚Sir嘅議員辦事處了解過，但截稿之前都未有回覆，所以實物應該係點用，相信網民都可以繼續發揮創意喇！
（互聯網）