政情：「卓」越眼光 旺樓唔旺股
曾任廉政公署調查主任的北區區議員林卓廷（阿廷），在去年區議會選舉勝出，今年想乘勝追擊入主立法會。阿廷趁農曆新正頭，尋日喺沙田寓所同傳媒拜年，仲分享投資心得，原來佢買樓睇得準，但買股票就做晒「明燈」。
阿廷話○三年沙士佢趁樓價低喺屯門買入單位自住，但因為○八年做廉署調查主任有平租宿舍住，就決定賣出原有單位，賺咗六十萬元。點知貪勝不知輸，諗住將賺咗筆錢再買入滙控（0005），而入貨前一日股價為五十幾元。
不過，由於佢返工時間唔可以睇住個股市，惟有一早同銀行落定指示，諗住四十幾元入貨應該實冇死。點知當年金融海嘯，滙控股價一日就跌咗十幾元，佢就成為當日第一個接貨嘅羊牯，阿廷仲記得當日喺廉署食晏睇新聞睇到呆咗。