尋日係年初三「赤口」，根據中國傳統習俗，容易招惹口舌是非，發生爭執。其實，今時今日嘅香港激進暴戾，衝突不斷，淨係「動口」已經好文明咯，幾乎郁啲就埋身肉搏，仲火爆過動作賀歲片吖。
嗱，繼年初一爆發旺角暴亂，年初二又發生屯門良景邨混戰，話說當晚深夜有數名流動熟食小販喺該邨附近街市一帶空地擺檔，期間遭多名穿住印有「管理員」字樣風褸嘅男子驅趕，雙方爭持不下，初則口角，繼而動武，有人仲涉嫌手持木棍施襲添，都咪話唔誇張。警方到場先控制場面，並拘捕一人；混亂中四人受傷，全部需要送院治理，包括一名記者。
其實，良景邨之前已發生過多次同類混亂事件，好似喺大除夕晚咁，又係因為熟食小販同「管理員」爭執，搞到連出入通道都堵塞埋，引起居民鼓譟，最後驚動警員到場調解，事件一直擾攘到清晨五點，整夜噪音擾民，搞到居民過年都不得安寧。最奇嘅係，負責良景邨管理工作嘅領展話涉事「管理員」並唔係佢哋嘅員工喎，咁呢班不速之客究竟係乜嘢人呢？
唔理點都好，良景邨「小販夜市」亂象叢生，講嚟講去皆因當局縮骨卸責而起。係人都知，無牌熟食小販涉及衞生、阻街及安全問題，必須監管，弊在良景邨早年列入租者置其屋計劃，加上領展入主商場，屋邨管理權四分五裂，房署固然變相卸責，食環署亦闊佬懶理，所以咪淪為「三不管」嘅法治真空囉。咁多年來，良景邨街市外面每晚都會化身「夜市」，居民不斷投訴，但係問題依舊，亂象不變，衝突不絕，結果釀成今次集體毆鬥事件。
「良景夜市」問題存在十多年，港產官僚互相卸膊，愛理唔理，唔係失職又係乜吖？冇錯，熟食小販無牌擺賣易生亂象，但只要規管得宜，一樣可以井井有條，一方面可以畀基層市民自力更生，一方面可以畀市民多個消費選擇，甚至可以發展為遊客熱點，一舉多得，何樂而不為呢？如果港產官僚真係以民為本，就應該諗辦法理順亂象，而唔係翹埋雙手，睇住居民同小販不斷爆發衝突都唔理。所以話，市民想有寧靜日子過，最應該消失嘅唔係無牌小販，而係無能官僚吖！
唔講猶自可，講起把幾火。無牌熟食小販問題持續十幾年，社會要求規管發展嘅呼聲不絕於耳，但係港府一直扮鴕鳥，以為將個頭埋入沙堆，問題就唔存在，結果問題不斷惡化，搞到家嘈屋閉，亂象不斷。最好笑嘅係，當局為咗虛應民意，早年搞咗個類似上環大笪地嘅天水圍「天秀墟」，點知人流疏落，生意慘淡，畀人噓就有份。
見微知著，港府連管理無牌熟食小販都做唔好，何德何能管理好香港吖。咪話功夫茶唔提醒，港府繼續胡混度日，觸發民怨，何止旺角發生暴亂，隨時全港暴亂都似吖！