探射燈：黑店陰招詐財 婚禮盡「㷫」
結婚結到一肚氣？婚姻大事要盡善盡美，攝影、花車、化妝、租衫服務瑣碎繁複，市面婚禮服務林林總總，亦有新人會光顧一站式婚禮統籌中介公司，代為安排各種服務。不過，日前卻有婚禮統籌店疑收取準新人服務費後關門，負責人被海關拘捕。有業內人士及中招新人踢爆，婚禮服務質素良莠不齊，陷阱層出不窮，有店舖低價吸客後未有提供服務，亦有新人原先預約倫敦的士作為花車，但結婚當日卻駛來一輛殘舊古董車，「焗住」收貨。消委會數字亦顯示，有關結婚服務及結婚統籌的投訴個案，去年較前年分別上升近三成及一倍。法律界人士指，部分婚禮統籌中介公司所簽訂的單據，未有列明條款細節，一旦出現問題，新人難以追討，蒙受損失。
招數一 低價吸客
將於今年三月結婚的Roy，去年尾到旺角一商場預約婚禮服務，其中一間一站式婚禮公司中介負責人以低價服務向Roy招手，「簽單時好好服務，加啲咩都話冇所謂，要幾多套衫都免費，攝影、花車、化妝、租衫全套都係二萬幾蚊，以為佢真係好有心幫我哋咩都唔識嘅新人。」
豈料Roy交款逾萬元後，中介負責人便告失蹤，店舖更於去年尾結業，一直未有兌現試妝等事前服務。雖然Roy有單有據，中介人的WhatsApp仍在線，但對方卻不理會Roy的婚禮死活，更遑論退款。Roy坦言，事後才驚覺低價招徠只是騙財的包裝手法，「事後諗先覺得奇怪，先知個價低得唔合理，乜都加得話唔使錢，其實只係想我哋交錢，然後就走佬。」Roy婚期逼近要再籌備婚禮，惟他不敢再惠顧一站式中介公司，寧願逐樣幫襯，減低風險，「估唔到啲人可以咁陰質，新人一生一次咁大件事，都可以呃人。呃錢之餘仲留低好大陰影，未婚妻仲要自責失眠咗成日。」
招數二 條款不清
婚禮服務業界人士蘇雄傑（Pandy）爆料，曾有新人光顧婚禮攝影服務，該公司表明會在大日子當天為新人拍攝主要片段（mainshot）及花絮片段（snapshot），一般公司會安排兩個攝影師到場拍攝。不過，當日只有一名攝影師到場，一人分飾兩角，「個攝影師嚟到，揹住兩部相機，話一部影主鏡，一個係snapshot。但間公司話條款只話會影兩個鏡頭，冇話會安排兩個攝影師。」
他指，亦有新人以低價租車，但條款欠清晰，陷阱處處，「新人話想提早少少用車，就話係超早更，要加錢；有新人想改行程，本身由中環去深水埗改中環去荃灣，就算路程短咗都話要加錢。」另外，更有禮服出租公司，未有清楚列明禮服如有污漬的賠償問題，當禮服出現「少少污漬」，出租公司會開高價的清潔費，「有啲公司租咗條舊裙出去，之後話你整污糟咗，清潔費要千八蚊，但買咗條裙就千五蚊，焗你買。」
招數三 偷龍轉鳳招數三
「大日子當日嚟到先知架花車貨不對辦，唔通彈鐘唔要改行路咩？惟有焗住收貨。」早前結婚的金先生從中介公司預約倫敦的士作為花車，但結婚當日卻駛來一輛殘舊古董車作為花車。最令他氣結的是，他事後多次投訴甚至向海關舉報，但海關指他已經上車，故控告機會渺茫，「擺到明佢就係知啲新人，因為大日子都谷住上車。」事後金更發現古董車的行車證過期，中介卻逃之夭夭。另方面，亦有新娘聘請化妝師在出嫁當天為自己化妝，惟當日現身的卻只有化妝師的助手，惟兩者收費差距甚遠。
招數四 被迫自費重買服務
貨不對辦已算萬幸，有中介公司收錢代辦律師證婚後，卻去如黃鶴。準新人阿敏因中介「消失」後自行聯絡律師，對方卻指中介未有將費用轉交給他，不會辦理婚書，着阿敏再付款，由於婚期逼近，只有無奈接受，「上網睇原來唔只一個人係咁，原來佢（中介）係用呢招收咗錢就走。」
另一新人阿軒同樣幫襯一站式中介服務，雖然大喜之日花車準時到達，惟租車公司卻指「中介未找數」，如新人想用車，要即時付款，「都冇得計啦，冇車點接新娘，咪照畀。」
執業大律師陸偉雄指，雖然中介難以顧及或控制合作公司的服務質素，但不能成為卸責藉口，中介有責任確保新人能順利使用服務。他稱，婚禮中介與客人簽訂的單據一般較簡單，欠詳細條款，當服務出現問題，客人往往沒有法律基礎追討任何一方，「真係要白紙黑字寫清楚條款細節，有幾長寫幾長，就算張單背後用手寫都可以。冇簽到合約就冇咗證據，有咩事都好難追討。」
圖／文：專案組