政情：容海恩學吹小號 改變人生
好多成功人士細個都可能曳到爆，新民黨靚女大狀容海恩（Eunice）都唔例外，雖然貴為大律師，但原來佢小五嗰陣考第尾，英文仲要特別差，同外國人完全溝通唔到，但係短短一年時間，成績就突飛猛進，唔通屋企有個怪獸家長狂操佢？
原來Eunice突然發憤，完全係因為臉皮薄。佢話讀小學時學吹小號，有次跟學校出國交流時要講英文，佢幾乎完全唔識講，覺得好瘀好醜，為咗挽回面子，之後開始發憤讀書。原來當時教育局局長孫明揚嘅太太鍾小芬就係Eunice嘅副校長，亦都有鼓勵佢，短短一年時間內，佢六年級就考到第三喇！
時至今日，Eunice已經成為大律師，仲係銀河管樂團主席，覺得小號改變佢一生，仲勉勵年輕人「凡事唔係絕對」。睇完Eunice發憤經歷，其實讀書唔一定要逼啫！