中環出更：名人談小販 振彬愛牛雜
尋日大年初三赤口，沙田馬場人頭湧湧，城中名人都入場湊熱鬧碰運氣。講開新春旺角發生暴亂，大家都議論紛紛，其中善德基金會創會主席董吳玲玲坦言好憤怒，認為有人藉撐小販為名搞事，實際搞到小販連檔都開唔到，又指拆晒行人路地磚去投擲警方係好暴力嘅行為，無一個香港人想見到。
董吳玲玲諗起年輕時放工會於碼頭購買魚肉碗仔翅，食完會好滿足，希望可以有合適方法保留呢類小販。同場仲有工業總會青委主席劉燊濤及太太吳奕筠，劉燊濤話好鍾意篤魚蛋，但太太反而冇乜興趣，話讀小學時學校管教好嚴，慣咗冇得食街邊嘢。健康快車香港基金創會主席方黃吉雯亦話，細個已經好注重健康飲食，又驚肚痛，所以都好少食街邊嘢。
不過，原來身家豐厚嘅觀塘區議會主席陳振彬（Bunny）好鍾意食牛雜，但考慮到衞生問題，近年已甚少光顧小販檔，改為幫襯小店。
梁青華密封式保護店舖
今個農曆新年，Bunny話留港消費，除咗同家人一齊去飲茶外，仲同咗兩個仔去打籃球，笑言兩個仔已經分別十歲及十二歲，趁兩個仔仲肯「黐」佢就「黐」多啲喎！
講起旺角暴亂當晚，有多間珠寶金行玻璃櫥窗被暴徒襲擊損毀，令唔少零售業擔憂保安問題。喺尖沙咀彌敦道開咗間名錶店嘅香港鐘表業總會前主席梁青華話，佢哋店面係用密封式捲閘，落閘之後喺店外乜都睇唔到，加上收舖後會將啲名錶收埋喺夾萬內，所以暫時冇咁驚。不過，佢好擔心香港有排亂，希望警方採取果斷行動保護商戶市民安全。
卓妮