唐代詩人劉希夷寫過首《代悲白頭翁》，一句「年年歲歲花相似，歲歲年年人不同」傳頌千古，其實何止繁花依舊，人面全非，連有七十年歷史嘅旺角花墟都面臨搬遷威脅，話唔定「歲歲年年墟不同」都似咯。
件事係咁嘅，最近花墟商戶收到政府建議，提出將佢哋集體遷去洗衣街政府設施嘅原址，希望可以改善阻街情況之餘，亦配合洗衣街用地闢作綜合商業及住宅發展咁話喎。
冇錯，花墟成日車水馬龍，熱鬧非凡，尤其新年及情人節檔期更加逼爆，人車爭路，險象環生，當局作出適當嘅規管係無可厚非。問題係，喺發展同重建之前，係咪應該先做足諮詢同埋周全嘅考慮，最重要嘅係有冇從商戶同顧客嘅角度出發呢？
唔講唔知，花墟歷史要從咸豐年間嘅《北京條約》講起，當年清廷割讓九龍半島畀英國，定居港九嘅外國人愈來愈多，由於西洋人習慣以鮮花裝飾家居，新界花農便每日到界限街附近賣花，漸漸成行成市，花墟道、花墟徑、花園街、園圃街及園藝街等都係因應花墟而來。即係話，花墟與香港開埠一百多年歷史息息相關，點止滿載住港人集體回憶吖，更加係香港重要嘅地標之一，點可以話搬就搬o架。
正如商戶話齋，呢個地方本來唔係由政府自主規劃，而係攤販聚集營商，由最初木頭車小販變成舖頭，然後成為愛花之人嘅聚腳地，花墟演變成世界知名而極具特色嘅景點，基本上同當局無關，加上不少商戶擁有業權，如果佢哋堅決唔搬，港府都係冇符嘅咋！
老實講吖，花墟商販對搬遷嘅反應咁大，除咗係家傳祖業同埋歷史回憶，更加因為有現實嘅問題。規劃署冇講明係安置去街舖抑或商場，小學生都知啦，植物要陽光水分，要焗搬入冷氣商場，真係種仙人掌都死喇，即係擺明趕盡殺絕嘅啫。
嗱，以「雀仔街」為例，當日因城市發展集體遷往位於界限街花園街嘅雀鳥花園，點知當局眼高手低，雀仔街失去原有嘅地道特色同活力，由遊人如鯽淪為門可羅雀。前車可鑑，花墟商販點會再做老襯咁笨呀。
冇計啦，港產官僚人頭豬腦，搞保育不嬲得啖笑，反觀台灣就唔同嘞，人哋知道夜市文化係寶，保育都保唔切啦，唔係講笑o架，單係台中逢甲夜市，一年觀光人次有上千萬，總營業額以百億元台幣計，既可保育地道文化，又可賺取經濟收益，真係唔到你唔服p架。
講到底，港府冇嘢叻，最叻做邊瓣衰邊瓣，唔止搞到小商戶雞毛鴨血，分分鐘連本土文化都連根拔起，咁就大件事咯。