今日年初一，猴年歲次丙申，先恭祝本報讀者新春大吉，萬事勝意！猴子跟人類一樣，都屬於靈長類動物（primate），此字由古老法語Primat及拉丁語Primas而來，前者意謂「最高級」，後者意味「第一」，是以猴子亦代表智慧。朋友的文藝雜誌徵稿，有這麼幾句：靈猴跳躍敏捷，期盼舊友新知，感染牠的靈動，揮灑靈氣，施展智慧，齊賦新詞華章……
老朽亦寄望香港未來一年，感染靈猴的智慧與敏捷，社會唔好咁多爭拗。過去一年，行政立法互相扯皮，鬥得不亦樂乎！議事堂烏煙瘴氣，政客一味叫囂拉布，淪為鬥獸場，經濟和民生放一旁，香港呢個「福地」，變成「雲彩影裏吹喇叭——空響」！空贏得全球經濟自由度二十二年排名第一又如何呢？可以當飯食咩？
唔該大家擘大雙眼睇吓，周邊城市無不着力拚經濟，新加坡固然一騎絕塵，上海、深圳亦迎頭趕上，港貨櫃吞吐量跌出全球四大，只能排在第五位，被寧波舟山港趕過。港產官僚如果依然好整以暇，不思進取，只會被上海、新加坡、深圳愈拋愈遠，繼續沉醉在「自由度」裏熏死。
新春開筆，本來唔應該有咁多牢騷，老朽只是提醒啲高官，唔好成日搬出一大堆誤以為道理嘅歪理，唔好成日自我感覺良好，無知上腦，智商下跑，香港再如此蹉跎下去，等港珠澳大橋香港段建好，高鐵香港站通車、西九文化區長多兩條草……睇怕香港都係冇運行！
今日年初一，出現「猴年、猴日、猴時」罕見嘅「三猴賀新春」時刻，上一次出現在一九二○年二月二十日農曆新年，距今九十六年，下一次將發生在六十年後嘅二○七六年二月五日農曆新年。願大家珍惜，老朽樂見「羊聚祥雲天降玉，猴騰紫氣地生金」，恭喜發財！