政情：公民講場：鄉紳「擊鼓鳴冤」茂波未驚過

最近有新界原居民因為「套丁」被判監，激起鄉紳們絕地反擊，不但成立小組籌錢上訴，仲積極組黨參選立法會捍衞新界人利益。一直冇乜聲氣嘅發展局局長陳茂波終於瞓醒，回應指政府唔認同鄉紳對套丁嘅觀點，不但揚言唔怕打官司，仲話政府將來發展新界時，唔排除會面對原居民嘅衝擊，但自言會勇敢面對。十八鄉鄉事委員會主席就話，鄉議局已經準備好就丁權問題提出司法覆核，笑言陳茂波唔怕打官司，「個個打官司都話自己贏「口架」啦」，鄉議局亦預咗單案有排打，「會同幾屆局長打」，擺明唔放陳茂波在眼內。呢單「新界風雲」肯定係連續劇，有排睇。