政情：今日你上鏡：打造「春」花園撞壞兩架車

人稱「年花大王」嘅香港鮮花盆栽批發商會盆栽部主席賴榮春（Sunny）入行廿幾年，唔止對花花草草瞭若指掌，亦寫得一手靚書法。咁有雅興，唔知佢有冇環境清幽嘅私家花園呢？Sunny笑笑口話，佢喺屯門藍地確有一個私家花園，入邊有小橋流水及各類果樹，環境相當清靜。佢話，有時入去行吓，真係幾舒服。不過，當年喺新界周圍搵地嘅過程都幾辛苦，事關佢一邊開車一邊周圍望，一唔小心就撞到石柱等硬物，車都撞壞咗兩架，諗起都好笑。