政情：余秋偉為小朋友考領隊牌
做洋酒生意嘅潮屬社團總會會董余秋偉（Edward），為做義工特登去考專業領隊牌！Edward鍾意做義工，尤其係幫助基層家庭嘅小朋友，數年前為咗帶小朋友到外地交流，於是決定考領隊牌。Edward笑稱，第一次入到課室上堂時，同學仔見到佢咁大年紀，仲以為佢係阿Sir添！
Edward話，攞到領隊牌之後，朋友經常叫佢組團去吃喝玩樂，不過佢堅持只帶團去鄉下潮汕。以為Edward最鍾意食潮州菜？錯了，其實佢最鍾意食日本菜。
品嘗「燒鳥」 讚不絕口
早前Edward特登到特色食肆林立嘅元朗教育路，幫襯人稱「基師傅」嘅米芝蓮名廚張兆基有份開嘅日本燒鳥專門店，燒鳥即串燒咁解。有名廚即燒即食，難怪Edward食到讚不絕口。