中環出更：侯強組黨揚言萬人加盟
上水鄉事委員會主席侯志強（侯強）上月喺新界鄉議局會議上提議籌組「新界進步聯盟黨」，上周更同鄉議局主席劉業強、副主席林偉強等人密會傾組黨，睇嚟組黨進度唔錯！雖然個黨仲未正式誕生，不過侯強充滿雄心壯志，預料屆時會有過萬人申請入黨添！
原來早前佢哋已經搵人簽入黨意向書，統計咗人數後，竟然有幾千人簽咗名交返。侯強預計，之前簽咗有意向入黨嘅人士，到個黨正式成立後會申請入黨，所以預料新政黨嘅黨員人數會相當可觀，分分鐘過萬人。侯強仲話，正式入黨申請表已經草擬得七七八八，再執吓啲細節就可以正式派發喇！
「等埋發叔」畀意見
新界人組黨氣勢如虹，但我哋亦聽聞劉業強接掌鄉議局冇耐，組黨咁多大件事除咗諮詢其他老臣子外，更重要係「等埋發叔」，皆因佢爸爸、鄉議局前主席劉皇發喺江湖打滾幾十年，組黨除咗係新界人嘅事，亦要考慮操盤人感受。據聞發叔雖然仲未正式出院，但基本上除咗行動唔係幾方便，思路仍然非常清晰。新進盟前路如何，都要發叔指引明燈嘅。
卓妮