中環出更：立會準爸爸嚴防寨卡來犯
懷疑會引致胎兒患上先天性小頭畸形嘅寨卡病毒喺拉丁美洲蔓延，香港亦嚴陣以待。早幾日卓妮見到準爸爸立法會議員郭偉強及陳恒鑌（Ben），梗要問吓佢哋點樣應對。Ben好擔心，話會提醒太太減少外出。郭偉強就唔驚，仲笑稱會諗辦法用自己去餵飽啲蚊，咁老婆咪安全囉！
正等待新生命來臨嘅Ben對寨卡病毒好擔憂，因為香港人多蚊又多，加上今年多雨水，環境條件似乎對病毒有利。Ben話，會提醒太太減少外出，自己亦勤力做功課，希望盡快搵到適合孕婦用嘅防蚊貼，因為坊間防蚊貼都有樟腦成分，會影響胎兒發展，所以屋企連臭丸都無。Ben果然夠晒小心。
施俊輝見慣蚊患冇有怕
郭偉強太太下個月臨盆，佢對香港嘅衞生環境相當有信心，所以冇嘢驚。佢話依家天氣凍，屋企並無蚊患問題，因此估計寨卡病毒對家人冇大影響。不過作為準父母，免不了會擔心，所以郭偉強打算犧牲自己去餵蚊。佢解釋話。孕婦體溫較高會比較惹蚊，所以佢會用盡一切方法令自己體溫高過太太，好似多做運動、食辣嘢及着厚衫等等，認真搞笑。
講明準備隨時造人嘅教育局局長政治助理施俊輝（Jeff），雖然未有好消息，但都應該提高警覺。Jeff就冇有怕，事關香港一直都有同蚊有關嘅疾病，好似日本腦炎，所以認為照平時咁防蚊就夠喇！佢仲好淡定話，香港仲未有個案出現，只要唔去南美，問題應該不大喎！
卓妮