銅鑼灣：維園公廁殘劣 食署捱轟
維園年宵已開鑼，惟有巿民不滿園內衞生欠佳。「個廁所本身就殘殘舊舊，連啲鏡都花晒，勉勉強強先叫照到個樣。通風又差，未入到去就已經一大陣味，搞到都唔知去唔去好！」陳先生指設於維園內的興發街公廁平日衞生情況欠善，每逢大型活動則更加惡化，「之前工展會，依家就年宵，咁多人去用，點解唔清潔多啲呢？」
發言人：衞生情況尚可
食物環境衞生署發言人證實，於一五年共接獲五宗相關投訴，而接獲本報轉介後亦有派員巡查，發現衞生情況尚可，但是為配合大型展覽期間的需要及維持優質公廁服務，承辦商已按要求增派服務員，加強相關清潔工作。
「就算同其他食環公廁去比，呢個廁所嘅情況都算差，我唔明佢哋把尺係點樣，咁都叫做『尚可』！」陳先生不滿食環署對衞生要求過於寬鬆，促請該署盡早檢討。