今年適逢黃大仙祠建成九十五周年，善信在年廿九晚入場「上頭炷香」，均可獲「黃大仙師卡」，一卡傍身倍感安適，相信黃大仙祠會有一番熱鬧！
「上頭炷香」已成新年習俗，不少善信爭崩頭去上頭炷香，希望為自己帶來最大福運，老朽今年亦會去逼埋一份，除了有機會見到夏蕙ＢＢ，更希望能夠學唐伯虎咁風流快活：「酒醒只在花前坐，酒醉還來花下眠，半醒半醉日復日，花落花開年復年」，咁嘅生活，你都咪話唔過癮！
活着——就係要有夢想！冇夢想，一如星爺話齋：同條鹹魚冇分別！諗吓幻想吓係冇罪嘅！
清‧袁枚喺《子不語》有解釋「燒頭香」嘅原因：凡世俗神前燒香者，以清早第一支為頭香，至第二支便不敬。「燒頭香」又以除夕夜搶新年頭香，即係正月初一清早第一香為主；老朽雖然年紀大，機器未完全壞！年廿九，一於去同大家趁熱鬧，望上頭炷香，實現夢想，化身唐伯虎點秋香！
有玄學家提醒老朽，原來香港嘅「地方時」實際比現行「標準時」晚了二十四分鐘，故在香港擇吉時，宜按香港時間，但不用「每個時辰的頭二十四分鐘」，是以二○一六丙申年「上頭炷香」，吉時首選年廿九日下午一時二十五分、下午五時二十五分、七時二十五分；老朽老眼昏花，怕黃大仙祠香火鼎盛熏到標眼水，睇怕會選下午人流較少時去上頭炷香也。
新的一年，但願所有人都能平安回家團圓享樂。看看內地每年的「春運」，日前廣州便有近十萬人逼爆火車站，場面墟冚兼悲壯。
是的，歸家的路再艱辛，趕回家的遊子應該是幸福的——因為遠方——有家、有愛、有親朋戚友、鄉親父老、有爸媽！老朽幼失慈母，每到新年，特別思念小時候媽媽煮的湯圓！