上任以來教育政策一團糟嘅教育局局長吳克儉（吳得掂），尋日聲稱小三全港性系統評估（TSA）風波係佢加入政府後最唔開心嘅事。佢又不點名批評立法會教育事務委員會主席林大輝，執意於去年十一月廿九日召開TSA公聽會，做法欠成熟，因為佢早幾個月前已請咗嗰日假。佢仲話，大家都係成年人，做事應該成熟啲喎！大輝就隔空反擊話，思想成熟同負責任嘅官員，絕對唔會為咗慶祝自己生日而唔理政務，堅持到日本賞紅葉兼吃喝玩樂。
