政情：行年宵掃貨 高永文無「運桔」
食物及衞生局局長高永文尋日去維園行年宵市場，為支持本地經濟，使咗逾四千元買猴子飾物、揮春及傳統小食等。不過，佢就無買年桔喇，可能怕「運桔」意頭唔好啩！高永文話，做官前確有買開年桔，貪有大吉大利嘅意思，又可以為屋企增添新年氣氛。不過，佢坦言做官後就少買桔，咁仲唔係迷信怕「運桔」？
豪氣撐師弟 巧遇冬叔
另外，佢行過桃花檔都無買桃花，反而買咗蘭花同百合，唔通佢驚會惹桃花，被老婆扭耳仔？其實桃花旺人緣都有利民望，局長唔使咁驚青避桃花喎。除咗辦年貨外，高永文仲特登參觀皇仁書院攤檔支持一班師弟，仲幫襯買咗一對手套同幾隻猴形公仔，仲豪氣畀一千蚊唔使找添。話說佢行年宵期間，巧遇六合彩之父「冬叔」夏春秋，咁都撞到，唔知佢會唔會即刻去買番張六合彩博吓運氣呢？