政情：米芝蓮大廚 「宇人」為敵
「傘兵」喺去年區議會選舉成績唔錯，據悉部分人有意「食住個勢」再戰九月立法會選舉，除咗搶攻地方直選外，更考慮挑戰傳統功能界別選舉。有消息指，西環飛躍動力成員、去年曾經參選中西區區議會西營盤選區嘅星級廚師伍永德（Steve），有意殺入飲食界功能界別，同連任多屆嘅立法會議員張宇人（Tommy）一較高下。
本身係廚師嘅Steve，參選區議會之前曾經喺堅尼地城一間米芝蓮一星推介法國餐廳任職大廚，之後為咗選舉而轉到選區附近嘅餐廳工作。選舉前佢曾經向傳媒透露自己多年前因為藏毒打交而被判守行為，強調已經改過自新，佢最後喺區選以五百八十幾票之差，輸畀角逐連任嘅民建聯盧懿杏。
據悉，Steve有意喺九月立法會選舉挑戰張宇人盤據四屆共十六年嘅飲食界議席，以佢嘅廚師身份，相信爭取足夠提名入閘唔成問題。不過，飲食界選民主要都係飲食業老闆，而且有好多都係Tommy嘅多年老友，已取得互信，若要改為支持Steve又談何容易呢？如果Steve真係決定落場參選，相信都只會係陪跑居多。
選舉經費似嚇窒伍永德
伍永德承認，曾經考慮過出選立法會飲食界，但考慮後發現選舉經費昂貴，而且飲食界以公司票為主，實在難以撼動，但未知佢最後關頭會唔會重拾區選時嘅氣勢宣布參選立法會。
面對可能出現嘅新星挑戰，Tommy就話，佢現階段未開始諗選舉，「無咁得閒回應呢啲問題」，但佢祝Steve及其老闆好運，事關個員工成日去佔領，都對間餐廳有好大影響喎。Tommy又話，佢去過Steve間餐廳食過幾次嘢添。不過煮得好食都無用，事關有資格投票嘅係Steve個老闆，員工無得投票；估唔到未落場埋身肉搏已經口水花四濺。