中環出更：創校60載 「浸」育人才滿堂
多間本地大學最近滿城風雨，浸會大學為慶祝創校六十周年，日前假浸大校園開騷沖喜，獲多位名人校友回巢粉墨登場，群星拱照。校友之一、食物及衞生局政治助理陳凱欣（Rebecca）仲為母校校慶酒會「兼職」司儀，佢上司、酒會主禮嘉賓食物及衞生局局長高永文借出愛將當然冇詐型，仲大讚呢位「浸大出品」係佢得力夥伴添！
校慶酒會除咗邀請浸大歷任校長出席，仲搵咗幾位名人校友落場飾演佢哋，重新上演浸大多個重要歷史時刻，好似長實執董「樓神」趙國雄就扮演吳清輝，葉家寶亦特地蠟起頭髮、換副眼鏡扮演陳新滋，晚會監製鄭丹瑞就扮演「高大版」錢大康等。
陳凱欣盛裝「兼職」司儀
Rebecca當晚盛裝出席酒會「兼職」司儀，性感又高貴，佢回憶當年入讀浸大新聞系志不在入行做記者，一心畢業後加入電台做DJ，更以民謠歌手兼著名DJ區瑞強為目標，但佢未畢業已經被無綫新聞睇中做實習記者，畢業後順理成章加入新聞界，直至○三年報道「沙士」消息認識高永文，後來再被高永文挖角，出任政治助理至今。
傳理學系係浸大招牌學科之一，除咗孕育出Rebecca，前亞視執董葉家寶亦都係浸大校友。葉家寶七八年喺浸大前身浸會學院傳理系文憑畢業，直至學院升格為大學後，再喺該校修讀傳理系，同母校一齊升格做大學畢業生。佢回憶當年「好乖」冇搞搞震，但同好多學生一樣滿腔熱血，曾經參與爭取中文合法化同保釣運動。
葉家寶做咗「量地官」一段時間反而發福唔少，佢笑言比起以前更加有啖好食，仲透露同咗好多傳媒界老友見面，相信三月中會正式「復出」喎。
卓妮