內地有雜誌為二○一六年作了五十條預言，提到經濟的有：二○一六年是「十三五」規劃開局之年。中央給「十三五」期間經濟發展的定位是「中高速增長」，平均經濟增速底線為百分之六點五。
此外，各大券商、銀行均普遍認為二○一六年中國的ＧＤＰ增速不會過七。高盛、滙豐銀行的預期分別是百分之六點四、百分之六點七，野村證券則預期從百分之六點七下調至百分之五點八。
點預測都好，城中首富早前已發出預警：「今年生意好多方面大家都要努力，唔係都幾難做。」話口未完，滙豐歷史性全球凍薪，連累恒生八千五百名員工慘被拖累無薪加，部分員工不滿成為陪葬品，揚言按章工作，準時收工！再講，香港零售業連續第十個月出現下跌，跌幅較○三年沙士時還要嚴重！二○一六年，港人肯定不會快樂！單是「廉潔蒙污」、「毒瘤為患」呢兩樣，政府如果諗唔出真正「辣招」去應對，一味自我陶醉在甚麼「全球經濟自由度」連續二十二年排名第一，港產官僚但知hea住等運到，大型基建工程如高鐵香港站搞到一鑊泡，一味靠嚇如果爛尾後果將會如何嚴重，追加撥款通唔過香港就會變成末日！
政府養埋一大班志大才疏之廢柴，老朽不禁想起三國時孔明陣前罵死王朗的狠話；廟堂之上，朽木為官；殿陛之間，禽獸食祿。狼心狗行之輩，滾滾當朝；奴顏婢膝之徒，紛紛秉政。以致社稷丘墟，蒼生塗炭。
香港變成今日嘅困局，除了是「五十年不變」誤搞成「五十年不管」，任由反中亂港嘅妖孽種下惡果，一眾高官處事寬鬆無度，該檢控的又一再放生，佔中幕後黑手依然可以「笑舞狂歌五十年，花中行樂酒中眠」，香港唔沉淪——天就真係冇眼喇！