政情：生意「傑」出 派花紅加人工
香港早前經歷五十九年來最寒冷嘅冬天，叙福樓執行董事兼多間連鎖餐廳老闆黃傑龍（Simon）就話，受惠於寒冷天氣，旗下火鍋同燒烤店嘅營業額都有兩至三成增長，仲透露會加員工人工同花紅，加薪幅度仲要超過通脹水平添。不過，佢無因為好生意而希望繼續凍落去，反而呼籲大家要注意氣候暖化問題。
面對經濟環境轉差，Simon覺得對零售市道影響無預期咁大，話香港人經歷咗幾次金融風暴後，炒股票心態同十幾年前已經好唔同，以前啲人會瞓身去炒，依家就比較穩陣，所以就算市況唔係太好，都唔會太影響消費意欲，過時過節仍然會出街食飯。
舖租「重皮」 暫加兩三成
講到舖租開支，Simon話租金仍然都係最貴，雖然賣奢侈品嘅舖位租金暫時回落，但整體飲食業租金仍然上升，升幅就由早幾年嘅一倍，回落至依家兩至三成，佢話業主好醒目，睇市道訂租金，暫時兩至三成加幅都算係合理喎。