本港「假難民」藉提出免遣返聲請滯留香港嘅問題極之嚴重，立法會保安事務委員會原定下月十九至廿五日前往澳洲考察，睇吓當地點處理免遣返聲請情況。不過，由於代表團成員涂謹申（阿涂）同體育、演藝、文化及出版界議員馬逢國甩底退出訪問團，令外訪取消。「假難民」問題威脅本港社會安寧，但阿涂同馬逢國都照放飛機，唔通佢哋都認為「假難民」問題唔重要？
澳洲代表團成員包括保安事務委員會主席葉國謙、副主席鍾國斌、阿涂、馬逢國及張超雄。馬逢國話，佢報名參加時，外訪嗰段期間都冇事務要處理，但之後「搭咗其他嘅事」，故決定退出。至於有咩事，佢就唔肯透露，唔知有咩事緊要過外訪呢？阿涂亦話嗰段時間要開會，至於係咪「假難民」問題唔重要，佢就話唔係咁諗喎。
葉國謙解釋，由於得番三個成員參加，「太少人組外訪團未必合適」，亦怕被指花公帑去遊埠，故決定取消，今屆立法會任期都唔會再就免遣返聲請事宜去澳洲喇。其實去唔成外訪都未必係壞事，因為「假難民」問題引起嘅治安問題迫在眉睫，等多一日都嫌多，仲話要等議員下月底去考察，真係蚊都瞓啦，不如政府快快處理好過啦！