政情：馬逢國亂噏 顧嘉煇離開咗
按中國傳統曆法，尋日「立春」正式踏入猴年，意味春臨大地，係好兆頭嘅開始。不過，對於有「樂壇教父」稱號的著名作曲家顧嘉煇（煇哥）來說，猴年首日已經被其同一界別的晚輩、體育、演藝、文化及出版界立法會議員馬逢國「咒」，皆因馬逢國尋日在立法會會議發言時，竟誤報煇哥與已故填詞人黃霑「已經離開」，嚇得人民力量陳志全（慢必）要求他澄清煇哥的「死訊」，認真大吉利是。
馬逢國尋日在立法會續會上為《二○一四年版權（修訂）條例草案》發言護航時，舉例指香港作曲家及作詞家協會（CASH）也是眾多個別創作人的代理機構，稱協會四千多名會員當中，「會員從好出名嘅，『已經離開咗我哋』嘅顧嘉煇、黃霑等作曲作詞人，到籍籍無名、仲等緊機會嘅年輕創作人」，也希望透過版權制度保障其利益及生計。
被要求解釋「離開咗我哋」
仍然健在的煇哥無故被晚輩宣布「死訊」，慢必緊接馬逢國發言後隨即插話，稱知道黃霑「走咗」，但煇哥本月底仍會在紅館舉行作品演唱會，要求馬逢國澄清。立法會主席曾鈺成亦加把口，要求馬逢國解釋「『離開咗我哋』即係咩意思」。馬逢國自知誤報「死訊」，惟有死死氣澄清，指是「包括離開咗我哋嘅黃霑叔，同好出名嘅作曲（家）顧嘉煇先生」。
雖則話煇哥經已榮休，馬逢國或可死撐煇哥只是「已經離開」樂壇，惟學慢必話齋，煇哥本月廿六及廿七日仲喺紅館搞「顧嘉煇金紫荊慈善演唱會2016」，籌款協助年輕音樂人完成夢想，演唱會亦已公開售票，難道馬逢國想犧牲自己，為煇哥演唱會「曲線宣傳」？
顧嘉煇：歡迎來看音樂會
年屆八十三歲的煇哥幽默地回應：「我好忙，正在籌備音樂會，今次主力都係為香港做善事，可能馬先生亦都貴人善忘，本人現時還健在香港，我非常歡迎他來看音樂會，一齊共襄善舉啦！」為煇哥主辦音樂會的丘亞葵表示，馬逢國可能貴人善忘，未有了解煇哥，可能一時誤會，所以請他看煇哥的音樂會，讓他更了解煇哥對香港樂壇的貢獻。馬逢國作為演藝界代表，今次認真老貓燒鬚！