中環出更：克勤「魚」昧 根叔出聲幫倒忙
再次證明薑愈老愈辣！前立法會漁農界議員黃容根尋日在社交網站，運用漁農專業知識，為黨友兼立法會議員陳克勤抱不平，皆因食物及衞生局局長高永文日前在立法會回應紅潮令大量海魚死亡時，曾指克勤不能將城門河嘅淡水魚死亡同海魚混為一談，但根叔力指高永文的講法有錯。不過，根叔唔講猶自可，一出聲就凸顯後輩似乎道行未夠，以致未能即時在會上反駁高永文。
兼批高永文只求甩身
話說漁農界議員何俊賢前日在立法會質詢，指三門仔養殖區鹽田仔一帶嘅魚排，因為紅潮而出現咗大量養魚死亡情況。點知克勤發言時，忽然講咗去城門河嘅死魚問題，要求當局交代令魚類死亡嘅污染源頭，即時被高永文質疑佢連海魚、河魚都分唔到，兩者不能混為一談，重申城門河死嘅係河魚，應該由環境局負責。
不過，根叔力撐克勤無搞錯，反指高永文卸責！佢解釋，實情係城門河先出現死魚問題，所以產生大量營養成分嘅有機物，搞到連接城門河嘅吐露港孳生大量米氏凱倫藻，最終引發紅潮，導致吐露港七個養魚區嘅養魚突然死亡！根叔認為，今次死魚事件全因政府監管不力造成，更批評高永文混淆視聽，為求甩身而罔顧事實。
卓妮