中環出更：「華」洋薈萃 善心抗逆
香港人一向樂善好施，但面對經濟市道差，慈善團體亦擔心來年籌款會面對嚴峻挑戰，連大型慈善團體東華三院亦有同樣憂慮。東華三院日前舉辦一百四十五周年慈善晚宴，主席何超蕸及副主席李鋈麟都擔心今年市道唔好，會少咗人捐錢，預計恒常定額捐款或會下跌兩至三成，希望影響唔會太大。
李鋈麟話，以○八年金融海嘯嘅經驗，估計今年的大型籌款活動善款數字影響不大，但恒常定額捐款或會下跌兩至三成。何超蕸認為，繼續提供優質服務係最好嘅應對方法，至於今年東華同事有冇人工加呢？佢就話，同事熱心服務，唔係為錢嘅，但都明白同事工作好辛苦，所以新春會封大利是喎。
宮廷長裙 步步小心
當日晚宴以「時光倒流1870」為主題，多位名人都着上百多年前嘅中西服裝，李鋈麟着皇帝裝扮康熙，話深深明白女士平日着裙有幾辛苦，而何超蕸同另一副主席馬陳家歡（Katherine）就約定着上宮廷裝，仲要襯埋顏色添！Katherine話，佢連結婚都冇着過咁長嘅裙，今次係第一次着，所以行路都相當小心。
東華三院前主席李三元同兩個兒子李曠怡及李仲怡亦難得同場現身。李仲怡話，佢件衫係爸爸訂造嘅，但係爸爸肥咗唔啱着，佢就攞嚟着喇，但件衫相當緊身，佢當晚唔敢食得太多嘢，仲要企直啲至得。至於着成套懷舊西服嘅李曠怡就話，由於市道太差，佢作為皮革供應商，下流工廠生意少，連帶佢嘅生意影響都好大，好擔心來年市道。
卓妮