政情：樓神自爆曾為示威留案底
前中大校長李國章入主港大校委會搞到滿城風雨，更激起港大師生及校友群起反抗，衝擊校委會會議。人稱「樓神」嘅長實執行董事趙國雄尋晚以校友身份出席浸會大學創校六十周年活動時，認為年輕人有激情係好事，但最重要一人做事一人當，皆因佢當年就讀正名前嘅香港浸會學院時，就因為參與「反貪污、捉葛柏」示威而被捕留案底，最後更因而退學添！
上街爭取捉拿葛柏
趙國雄回憶當年參與學聯，與已故港大學生會會長陳毓祥爭取捉拿時任總警司葛柏而走上街頭，最終被港英政府控以非法遊行及非法集會而留案底及守行為兩年。為咗唔影響當年浸會學院爭取正名，決定退學並輾轉留學加拿大。
趙國雄認為，社會進步需要有理想、有激情嘅年輕人，但學生參與社會運動時，應以不影響他人自由為大前提，最重要係事後承擔責任。佢仲話，至今都無悔當年，回港發展亦無隱瞞他留案底嘅往事，求職亦唔受影響喎。