政情：內地實習良機 港青獲「啟」示
年輕人到內地實習嘅機會愈來愈多，香港青年聯會前主席霍啟剛尋日以青年事務委員會旗下青年內地交流及實習工作小組召集人身份，同一班後生仔簡介內地實習資助計劃。佢話，內地好多特別嘅實習工作喺香港搵唔到，所以港青要把握機會，不要輕易中途放棄。
工作種類香港罕見
啟剛話，計劃提供嘅實習工作有啲幾得意，例如有同學試過到故宮博物院、宋慶齡故居等地做導賞員，呢項工作挑戰性好大，事關要短時間內摸熟地方，仲要用普通話介紹。仲有一項工作好特別，就係到北京街道辦幫居民處理投訴、寫報告，呢啲機會香港唔會有。
啟剛話，實習計劃為期四星期，希望同學一旦參加，就唔好輕易放棄。到咗提問環節時，點知第一個提問嘅大學生就問，萬一實習期間有急事要返港點算？啟剛惟有苦笑話，咩係急事大家應該心中有數，總之咪浪費咁難得嘅機會喇！