政情：新界三「強」 密會組黨
新界鄉議局早前開會時有人吹雞籌組「新界進步聯盟黨」（新進盟），但鄉議局係法定諮詢機構，提出臨時動議嘅上水鄉事委員會主席侯志強（侯強）亦無奈收口，留番選舉工作委員會開會先討論。正所謂殺戮戰場，要去趁早，鄉議局主席劉業強前晚趁宴請副主席林偉強、侯強及其他鄉頭食團年飯時，兼夾商議組黨事宜。三「強」密會，但就唔見做咗切膽手術嘅另一名副主席張學明，唔通佢身體仲未康復，抑或民建聯中人嘅身份太敏感？
將另設小組籌備
我哋聽聞，呢頓組黨飯局獲多個鄉頭現身撐場，坐滿四圍枱，大家原則上支持組黨。有鄉紳揚言，要靠組黨新界人先有出路，並屬意劉業強「揸莊」，喺鄉議局體制外另設小組籌備組黨，料農曆新年後成事。
組黨梗係要參政，不過目前佢哋仍未有出戰立法會人選及人數等方案。鄉事派喺四年前立法會選舉時，派出邱榮光同陳強分別出選新界東及新界西，惟雙雙敗北。佢哋認為，未來應該改變鄉事派只維護原居民利益嘅固有形象，提升至維護泛新界人利益，包括喺新界從事物流、耕種等工作嘅人，一旦日後再遇到西灣事件、鄉郊土地爭議，咁就可以吸納多元化選民嘅支持。
票源人選成隱憂
鄉事派組黨似乎轉入大直路，但其實障礙都唔少。有缺席前晚飯局嘅鄉紳表明唔撐組黨，仲話就算派人出選，都未必盲撐咁話。票源、人選都係新進盟首要面對難關，就連早前盛傳會出戰新界西嘅元朗區議會主席沈豪傑，都表明區議會及律師行事務已經夠晒忙，根本無可能兼顧立法會工作，所以無意參選立法會。
鄉事派山頭林立亦係障礙之一。過往鄉紳之間以至同建制派政黨關係錯綜複雜，有鄉紳認為，若加入咗新進盟，就唔可以再笠幾頂「帽」，否則新進盟遲早被邊緣化。一早表態入咗新進盟就退出自由黨嘅侯強接受查詢時亦講明，希望劉業強以身作則退出經民聯。但亦有鄉紳堅持話，只要知道自己核心所屬邊個黨就得喇。