中環出更：建制議員抗拉布 有啖好食
立法會泛民主派就《2014年版權（修訂）條例草案》拉布拉唔停，為對抗泛民瘋狂點算會議法定人數，建制派就發明咗「整點休息」，只係每小時離開會議廳休息十三分鐘，以防再流會。商務及經濟發展局局長蘇錦樑（Greg蘇）等官員尋日就先後親自帶同點心、燒味等美食探班為建制派打氣，但一班泛民議員亦冇執輸食埋一份，食完仲要彈三彈四，令一向痛恨拉布嘅工聯會王國興大鬧泛民議員。
話說尋日朝早Greg蘇買咗叉燒包、蝦餃等熱辣辣點心為建制派「送暖」，到下午唔知係咪驚建制派食晏食唔飽，又有官員帶同燒肉、叉燒及北海道牛乳蛋撻去會議廳前廳。
蔣麗芸反擊被秒殺
拉布嘅人民力量議員陳偉業（大舊）一於冇執輸食埋一份，但食完仲要嫌三嫌四，大彈燒肉塊皮稔晒，唔夠脆喎。大舊仲講明，佢「食還食，布一定會照拉。」激到王國興大鬧泛民「又食又拉，厚顏無恥」！
可能因為食飽飽，開會動力都大啲，班建制派議員在會上多次提出規程問題向泛民挑機，其中蔣麗芸（Ann）就話，根據議事規則，議員喺全體委員會階段只可討論法案細節，不得討論其原則，但主席曾鈺成就話發言嘅議員並冇違反議事規則，即時秒殺阿Ann。
其後公民黨陳家洛發言，引用法國哲學家笛卡兒名句「我思故我在」，質疑建制派喺會議廳內又唔係諗嘢，又唔係發言，「有軀殼、無靈魂」，建制派梁美芬就從座位「彈起」，高呼「佢話建制派唔用腦！」，要求陳家洛收回言論。搞到暫代主席職務嘅梁君彥要特登休會翻聽錄音做裁決，結果裁定陳家洛並無違規。最後開咗十一個鐘會都係得個吉。
卓妮