今年天氣變幻無常；一係熱到人黐線，一係凍到人飛起；香港夏天熱起上嚟，並非「暖風薰得遊人醉」，而係「熱風烤得人都癲」，住在劏房的基層，炎炎夏日，尤其是七、八月，好難捱也；至於冬天，本以為香港近年凍極有限，誰知來個大反常，「一夜北風寒，霜雪紛紛落」，都算近六十年一遇！
「你在北方的寒風中吹着暖氣，我在南方的風雪裏流着鼻涕」；廣州的朋友說，廣州市區六十五年來首次下雪；「世紀寒潮」來襲，世界各地氣候都異常，老朽在街上碰到熟人，不是問：食咗飯未？飲咗茶未？而係「今天好鬼死凍啊！」在冷嗦嗦的呼出寒氣後，兩手搓得勁用力，擺着臃腫的身軀口噴着寒煙道一聲：您老保重啊！
冰封香港，幼稚園、小學及特殊學校——史無前例因天冷停課；天文台自一九九八年將暴雨警告與停課掛鈎後，未曾因寒冷天氣而安排學生放假；看來，吳得掂吸收呢次教訓，停課指引要快些、清晰些，唔好畀家長、學校老師斥責反應遲鈍啦！有間中學因天冷自行宣布停課，老朽認為值得一讚，皆因學少一日總好過因咁鬼凍而傷風感冒！
講開又講，今次大批市民趁高興上大帽山及飛鵝山賞霜後，因路面結冰被困，警方要即時封山，配合消防員、救護員「跣住救人」，這方面確實發揮「正能量」，理應鼓掌稱讚！而老朽上東網，睇到有野蠻港女竟不滿警方封路，話係「限制自由」，不斷向警方「挑機」！香港近年來之所以紛紛擾擾，無時安寧，很大程度就係多了一班刁民，不知「自由」為何物，輸打贏要，任性妄為，無視法律；香港沉淪，有迹可尋，佔領運動之後，禮崩樂壞，社會從未有一刻安寧過；但願堪輿家所言係真嘅：嚟緊猴年代表靈活多變，會有轉機，祝福香港！