中環出更：盆菜抗冷鋒 「娟」出禦寒法寶
近日氣溫急降，除咗着多件衫，親朋好友圍埋食盆菜都係一個唔錯嘅選擇。香港青年協會最近舉辦「鄰舍團年飯」，喺全港十八區筵開千多席盆菜宴招待市民，日前首場盆菜宴得到多名高官、政界 人士現身撐場，其中社會福利署署長葉文娟自爆，雖然天氣寒冷，但父母堅持唔開暖爐，唔知係因為慳錢定享受自然生活。佢又笑言細個無暖爐用，大個一日一杯咖啡都足夠保暖。
人稱「媽打」嘅民政事務局前常任秘書長李麗娟亦周身禦寒法寶現身，佢除咗身上嘅薄羽絨背心，手袋亦放咗幾個暖包備用。至於佢手上嘅青色露指手套，原來係來自家姐嘅溫暖牌，雖然手指露晒出嚟，但佢認為「啱啱好」，方便佢夾餸食咁話。
農曆新年將至，又係一家人聚首一堂嘅好時機，媽打話佢女婿嘅父母都住喺台北，所以每年都會隨女婿赴台過年。
佢又話，台灣好多舖頭於新年期間都休息，所以大家都要喺家中煮飯，適逢佢嘅親家煮得一手好餸，可以過一個豐盛新年之餘，仲可以一 家人打台灣麻將，真係不亦樂乎。
恒常運動 「心」身強健
同場仲有本身係醫生嘅華懋集團主席龔仁心，於寒冷天氣下只身穿一件衞衣同皮褸，點知佢話咁樣着已經有少少熱，仲出咗啲汗。
龔仁心其後又分享強身健體之道，話每星期都會抽一日時間健身，每晚行二十分鐘路呢個習慣更維持咗廿幾年。
卓妮