上水鄉事委員會主席侯志強（侯強）日前提議成立「新界進步聯盟黨」參選立法會，標誌鄉事派最快今年唔會再幫民建聯「抬轎」，民建聯要於新界東、新界西最少取得兩席，認真凍過水。侯強尋日出席電台節目時，自爆鄉事派「好大想頭」嘅目標，就係希望喺新東、新西各取兩席，連埋鄉議局功能界別議席，換言之合共取得五席，並直言一旦成功組黨對民建聯影響最大。
鄉事派同民建聯關係一直被指不咬弦，愈來愈多客觀事實亦印證呢一個說法，本月初元朗區議會主席之爭，鄉事派力撐嘅律師沈豪傑，一舉擊敗爭取連任嘅民建聯梁志祥，成為新任元朗區議會主席；及至下月底舉行嘅立法會新界東補選，鄉事派亦做到出面，一直未有言明會撐民建聯周浩鼎。
據知新界鄉議局月底另有會議討論組黨詳情，但對是否支持民建聯代表參加補選，完全不在議程之內，擺明要畀啲顏色予相關人士睇。除咗周浩鼎，新東補選參選人還有公民黨楊岳橋、新思維黃成智、本土民主前線梁天琦、報稱獨立嘅方國珊、梁思豪及劉志成。