安仔是新入職跟車，今日如常上班，可是不見他的好拍檔。
安仔：健哥，做咩唔見阿職嘅？
健哥：佢患咗膝骨關節炎，喺屋企休息囉。
安仔：咩「失」骨關節炎話？
健哥：膝骨關節炎係常見的一種退化關節毛病。由於膝關節腔內的軟骨及相關的骨骼結構受損，導致膝關節痛楚同功能障礙。呢個病嘅成因有好多，包括年齡增長、身體過重。國際勞工組織將呢個病定義為「與工作有關的疾病」，即工作環境因素可能是成因之一。
安仔：乜同開工有關係咩？
健哥：係，如工作需要搬運重物，經常站立、走路或蹲下嘅動作等。
安仔：有咩症狀？
健哥：早期症狀包括上落樓梯時，膝關節疼痛，早上起身覺得膝關節僵硬。後期疼痛同僵硬情況加劇，嚴重甚至出現關節觸痛同腫脹。
安仔：愈講愈恐怖，仲可能同工作環境有關。我哋做貨倉成日搬重嘢，咪好易中？
健哥：係呀，唔止我哋，好多唔同行業人士，包括搬運運輸、飲食業、清潔及建築等，都比較大機會患上。
安仔：咁點算好呀？
健哥：唔使擔心，好多方法可以預防。如避免長時間屈膝或蹲下的動作，盡量減少需要體力勞動的工序，搬運重物時應使用輔助工具減低膝關節負擔。最後，當然係保持適當體重同進行適當運動，強化肌肉。
安仔：健哥，你真叻，知道得咁多。
健哥：哈哈，其實只係我一向都有留意職業安全健康局嘅資料。
職業安全健康局
www.oshc.org.hk