廢騎長霸泊位部門鬥卸

「有架就行車證過咗期差唔多三年，仲有兩架就甩皮甩骨，連轆都拆埋，畀人放喺一邊，唔通變咗做劏車場？」陳先生不時駕駛電單車到中環，並在愛丁堡廣場露天免費泊位停泊，發現該處有數架行車證失效，及損壞嚴重的電單車長期停泊，令泊位「一位難求」，「呢度就淨係得六十幾個位，但就起碼有六、七部車長期泊喺度，搞到想搵個位泊都難。」

車主焗泊旁邊 屢被抄牌

由於泊位經常爆滿，陳指只好於劃定泊位旁邊泊車，因而屢屢被抄牌罰款，曾向政府部門反映，惟其後亦未見跟進，「運輸署就覆收到個投訴，警方就話落過去睇，聯絡過登記車主就話轉咗手，唔知物主係邊個。之後就不了了之，冇人清啲廢車！」

甩皮甩骨 有遭拆下車輪的電單車棄置泊位前，其後被搬移到一旁。	放大圖片	行車證過期 至少兩部電單車行車證已經失效，當中一輛已逾期三年。

事實上，本報於去年九月已報道灣仔區內盧押道、謝斐道電單車泊位有多輛懷疑廢車，但當時警方、運輸署及地政總署均指非其職責所在。實地了解期間，多名司機亦指問題遍及香港仔、大坑、銅鑼灣及西環等地點。

車牌剩半截 有電單車車牌只剩下半截，惟仍佔用公眾泊位。	司機點睇 袁先生：「幾乎每個排骨位都有廢車，喺大坑、銅鑼灣啲泊位都有見過咁嘅情況。」	何先生：「西環嗰邊都好多廢車霸住車位，政府應該清走啲太耐冇郁、牌費過期嘅車。」

警方發言人證實，過去一年曾接獲兩宗有關愛丁堡廣場露天免費泊位交通違例的投訴，期間發現四輛遺棄電單車，已轉介相關部門跟進。

運署警方地署 權責不清

惟地政總署及運輸署發言人均以電話口頭回覆，指不會書面回覆查詢。地政總署發言人解釋，曾接獲警方轉介相關事宜，已多次回覆該署只負責無部門管理的官地，故應交由運輸署負責；運輸署發言人則稱，警方已作回覆，未有補充。

「好多時件事牽涉多過一個政府部門，就會大家互相推卸責任。就好似社區單車違泊，亦係因為咁而好少執法，拖好耐都未解決。」立法會交通事務委員會委員范國威直指，因政出多門而令違法問題持續多時的情況已非首例，認為部門有責任加強協調，採取聯合行動以保障公共資源，「有啲人誤以為冇辦法去追究佢哋，個問題再拖只會更加普遍，到時更多司機無辜畀人抄牌，只會令民怨上升。」

i report_00042132

記者︰呂耀焜